Бүгін Л.Н.Гумилев атындағы Еуразия ұлттық университетінде «құқықтану» және «халықаралық құқық» бағыттары бойынша 160-қа жуық бакалавр, «сот билігі мен қылмыстық сот төрелігі», «сот сараптамасы», «халықаралық құқық», «интеграциялық құқық» бағыттары бойынша 25 магистрантқа диплом тапсыру рәсімі өтті.

Салтанатты рәсім барысында «Л.Н.Гумилев атындағы Еуразия ұлттық университеті» КеАҚ Басқарма мүшесі – Әлеуметтік-мәдени даму жөніндегі проректор, ҚР ҰҒА академигі Дихан Қамзабекұлы диплом алған түлектерді айтулы күнмен құттықтап, олардың бүгінгі табысына оқытушылардың, университеттің диссертациялық кеңесінің бірлескен күш-жігерінің арқасында қол жеткізілгенін жеткізді. 

–Оқу орнының тарихында біз бакалаврлар мен магистранттарға тұңғыш рет университеттің жаңа үлгідегі дипломын тапсырып отырмыз. Оның дизайны өзімізге де, әлемдік стандартқа да сай келеді, – деді проректор.   

Биылғы жылы заң факультетінің «Құқықтану» білім беру бағдарламасы QS әлемдік пәндік рейтингі бойынша үздік 200-ге енді. Факультетте 12 заң ғылымдарының докторы, 20 ғылым кандидаты, 8 PhD докторы, сонымен қатар елімізге танымал заңгер-ғалымдар дәріс береді.

–Адам неғұрлым көп білген сайын оның мүмкіндігі де соғұрлым арта түседі. Сіздерді әділетті Қазақстанның дамуы мен өркендеуіне лайықты үлес қосады деп сенемін. Бұл үшін сіздер ерінбей еңбек етіп, алға қойған мақсат жолында табанды түрде ілгерілей берулеріңіз керек, – деді Қазақстанның заңгерлер одағы Республикалық қоғамдық бірлестігінің төрағасы Серік Ақылбай.