29 Апреля 2016
Бүгін Л.Н.Гумилев атындағы Еуразия ұлттық университетінің қабырғасында университеттің 20 жылдығына орай «Бос орындар жәрмеңкесі - 2016» шарасы өтті. Шара арнайы университет түлектері мен болашағын бағдарлай білетін мамандар іздеген жұмыс берушілер үшін арнайы өткізіліп отыр. Жиынға 250-ге жуық жұмыс беруші ұйымдар мен кәсіпорындар қатысты.
Жәрмеңкенің салтанатты бөлімі Президент аудиториясында өтті. Шара шымылдығы университеттің «Самұрық» би тобының биімен ашылды. Салтанатты жиын барысында ЕҰУ оқу ісі жөніндегі проректоры Молдажанова Асемгүл Александровна университет ректоры атынан жұмыс берушілерге лебізін білдіріп, 2016 жылдың 25 мамырында өткізілетін университеттің 20 жылдығына арналған шараға қатысуға шақырды. Сондай-ақ, университет жетістіктері мен 20 жыл ішінде атқарылған еңбектерін атап өтті.Шарада биік белестерді бағындырған түлектер жайлы бейнематериал көрсетілді. Олардың қатарында мемлекеттік маңызды мандаттарды атқарып отырған Асқар Мамин сынды азаматтар бар. Шарада №48 мектеп-гимназия директоры Зәуре Садықова сөз алып, жастарды белсенді әрі батыл болуға шақырды. Өз өмірлік тәжірибесімен бөлісіп, ізденіс пен білімнің, ғылымға ден қоюдың жас талғамайтынын айтып өтті. Шараға университет студенттері де белсене қатысты. Халықаралық қатынастар факультетінің 4-курс студенті Маржан Анламас университет басшылығы мен ұстаздарына студенттер үшін жасап отырған мүмкіндіктері үшін алғыс айтты. Белсенді студент университет аясындағы академиялық ұтқырлық, сондай-ақ, «Еrasmus Mundus» халықаралық бағдарламасы негізінде шет елдерде білім алып, тәжірибе алмасып қайтқан.
Бүгінгі жәрмеңке мақсаты - жұмыс берушілер мен түлектер, факультеттер арасында тікелей байланыс орнату мен университет түлектерін жұмыспен қамту болып табылады. Жәрмеңкеге қатысушысы жұмыс берушілер ішінде Қазақстан нарығында нық орнаған «BI Group», «ҚазақМыс Корпарациясы» ЖШС сынды ірі компаниялар бар. Шара барысында жұмыс берушілер мен түлектер арасында белсенді қарым-қатынас орнатылды.
«Мұндай шаралар университет түлектері мен студенттері үшін жасалып отырған үлкен мүмкіндіктер алаңы. Өз студенттеріне осындай жағдай жасап, сапалы білім мен саналы тәрбие беріп отырған, жан-жақты дамуына бар мүмкіндікті тудырып отырған университет басшылығына алғыс білдіремін. Өз мамандығыма сай келетін бірнеше ірі компаниялар мен бұқаралық ақпарат құралдарына өз түйіндемемді қалдырдым. Ол жерлерден іс-тәжірибеден өтуге ұсыныс алдым. Міне, бұл жәрмеңке аясында жасалып отырған жұмыс нәтижесінің бір көрінісі деп айтар едім», - деді журналистика және саясаттану факультетінің 4-курс студенті Жұлдыз Аманқұл.
Жанар Салыбай
Журналистика және саясаттану факультетінің 4-курс студенті
