29 Марта 2019
Бүгін Л.Н. Гумилев атындағы Еуразия ұлттық университетінде «Бос орындар жәрмеңкесі – 2019» шарасы өтті.
Бос орындар жәрмеңкесін өткізудің басты мақсаты – ЖОО түлектері және Нұр-Сұлтан қаласынның жастары арасында жұмыссыздықты азайту және оның негізгі міндеті – бастаушы және тәжірибелі жастарды нақты жұмыспен қамтамасыз ету болып табылады. Өйткені бұл тұрғыда Елбасының 2018 жылғы 5 қазандағы «Қазақстандықтардың әл-ауқатының өсуі: табыс пен тұрмыс сапасын арттыру» атты Қазақстан халқына Жолдауында «Жоғары оқу орнының табыстылығын бағалаудың басты критериі – оқу бітірген студенттердің жұмыспен қамтылуы, жалақысы жоғары жұмысқа орналасуы» деп атап өтілген.
Шараға Л.Н.Гумилев атындағы Еуразия ұлттық университетінінің халықаралық байланыс және инновациялар жөніндегі проректоры Баубек Сомжүрек бастаған факультет декандары, университет түлектері және Жұмыс беруші компаниялардың өкілдері қатысты.
Шараның ашылу салтанатында сөз алған Еуразия ұлттық университетінінің халықаралық байланыстар және инновация жөніндегі проректоры Баубек Сомжүрек жыл сайын 4-4,5 мыңға жуық жас маман түлеп шығатынын, жұмысқа орналасқан түлектердің пайызы жылдан жылға өсіп келе жатқанын жеткізді. Былтыр университетті бес мыңға жуық түлек бітірсе, биылғы көрсеткіш те сол шамада болғалы тұр екен, яғни 2019 жылы ЕҰУ-ді 4570 (бакалавриат, магистратура, докторантура) түлек бітіреді деп күтілуде. Білім берудің барлық деңгейлері бойынша 2018 жылғы түлектердің оқу бітіргеннен кейінгі жұмысқа орналасқандар үлесі 87%-ды құраса, биыл олардың 80-90 пайызы жұмысқа орналасады деп болжанып отыр.
Білім алушылар мен түлектерді жұмыс берушілермен жақындастырудың ең тиімді әдісі бос қызмет орындарының жәрмеңкесін өткізу болып табылады. Жәрмеңкеге жұмыс берушілердің қатысу қарқыны жұмыс берушілердің оған деген қызығушылықтарының жылдан жылға артып, сапасының көтеріліп келе жатқанын көрсетеді.
Бүгінгі жәрмеңкеге білім, әлеуметтік-мәдени және экономика-бизнес саласындағы ұйымдар мен мекемелер жәнееліміздегі ірі компаниялар қатыcып, олардың арасынан Сертификаттау және ғылыми жұмыстарды дайындау бөлімінің бастығы Гүльмайда Кәрімова, "Here Kazakhstan" ЖШС аймақтық директоры Ажар Нұртазина, Сәулет-құрылыс факультетінің 2014 жылғы түлегі - ««Астана Бас жоспары» ғылыми-зерттеу жобалық институты»» ЖШС басшысы Нұрсұлтан Қасымов сөз сөйледі.
ЕҰУ түлектері бүгінде Қазақстанның беделді мекемелерінде қызмет жасайды. Атап айтқанда, олардың арасында: «Қазақстан Ғарыш Спары», «Қазақстан темір жолы» ҰК АҚ, «Самұрық-Қазына» Ұлттық әл-ауқат қоры АҚ, «ҚазМұнайГаз» ҰК» АҚ, «ҚазАтомӨнеркәсіп» ҰАК, «Қазақстандық мемлекеттік-жекеменшік әріптестік орталығы» АҚ, «Парасат» Ұлттық ғылыми технологиялық холдингі, «Қазақтелеком» АҚ, ВI Group Холдингі, «АЗИЯ АВТО» АҚ, «Қазақстан Ғарыш Сапары» ҰҚ» АҚ, «Қазтранском» ЖШС, «Зерде» Ұлттық инфокоммуникациялық холдинг секілді ұйымдар бар.
Соңғы жылдары бизнес пен студенттер арасындағы сұхбат форматы игі көмегін тигізіп келеді: жұмысқа орналастыру мәселелері бойынша бітіруші курста өткізілетін «дөңгелек үстел», компанияны таныстыру және білім алушылар мен түлектерге арналған шеберлік сабақтарын өткізу үшін ұйым өкілдерімен кездесулер болып табылады. Жұмыс берушілер мен жұмысқа жас мамандарды тарту үшін кәсіпорындармен келісім бойынша студенттер ары қарай жұмысқа орналасу мүмкіндігі қарастырылған кәсіптік тәжірибеден өтеді. Жыл сайын кәсіпорындармен, ұйымдармен жаңа ұзақ мерзімді келісімшарттар жасалады. Соңғы үш жыл көрсеткіштері жасалған ұзақ мерзімді келісімшарттардың, оның ішінде, әрі қарай жұмыспен орналасулардың саны өсіп келе жатқанын байқатты.
Университет пен өндірісті жақындатудың маңызды қадамы кәсіпорындар мен ұйымдар негізінде кафедралар филиалдарының қызмет атқаруы. Қазіргі таңда 69 кафедра филиалдары қызмет атқарады.
Жұмыс берушілер күнінде бітіруші түлектер сөз алып, бұрын бұл жиынға білім ошағының студенті ретінде қатысып келсе, енді Жұмыс берушілер кеңесінің мүшесі ретінде қатысып отырғанын айтады. Білікті мамандар, сонымен қатар бүгінгі «Бос орын жәрмеңкесі» екі жаққа да пайдалы болатынына сенім білдіруде және олар университет түлектеріне табыс тіледі.
Еуразия ұлттық университетінің түлектері Динара Әлімғазиева мен Омар Бекжігіт бүгінде «Қазақстан Ғарыш Сапарында» еңбек етсе, Нұрсұлтан Досымжанов Нұр Отан партиясының Нұр-Сұлтан қаласы «Нұр» филиалы төрағасының бірінші орынбасары.
Естеріңізге сала кетейік, Л.Н.Гумилев атындағы Еуразия ұлттық университетінде Жұмыс берушілер Кеңесі құрылған. Оның құрамы толық бекітіліп, оған университетте мамандар дайындау жүргізілетін бағыттардағы еліміздің экономика және басқа салалардағы мекемелері мен кәсіпорындарының өкілдері ендірілген. Сондықтан да Л.Н.Гумилев атындағы Еуразиялық ұлттық университетінде құрылған Жұмыс берушілер Кеңесі университет пен жұмыс берушілердің бірлесе отырып жоғары білікті мамандарды даярлау бағытындағы өзекті мәселелерді анықтап, нақты ұсыныстар әзірлейтін және оларды шешу жолдарын талқылайтын пікірсайыс алаңына айналып отыр.
Қысқасы, Еуразия ұлттық университетінде өткен «Бос орындар жәрмеңкесі – 2019» шарасы жұмыс берушілер мен университеттің осы бағыттарда дамуына және өзара ынтымақтастық қатынастардың нығаюына үлкен үлес қосуда. Бүгінгі өткен шара соның айқын дәлелі.
Баспасөз қызметі
