ЕҰУ қоғамдық қабылдау: жатақхана мәселесі ең өзекті мәселелердің бірі
Л.Н.Гумилев атындағы Еуразия ұлттық университетінің Студенттер үйінің директоры Азамат Жұматаев қоғамдық қабылдау өткізіп, студенттердің сұрақтарына жауап берді.
Қоғамдық қабылдауға келген студенттер жатақханалардағы тұрмыстық техниканы жаңарту мәселесін көтерді, атап айтқанда, олар кір жуғыш машиналар мен ас үй пештерін жаңартуды және олардың санын көбейтіп, әр қабатқа бөлуді сұрады. Сондай-ақ, өндірістік тәжірибеден өту кезінде жатақханадағы орындары жайлы білгісі келді.
Студенттер үйінің директоры Азамат Жұматаев кір жуғыш машиналар мен ас үй пештері қабылдау мерзіміне қарай жаңартылатынын, ал өндірістік тәжірибеден өтетін студенттерге жыл сайын ешқандай кедергісіз жатақханалар берілетінін, егер олар тұратын бөлмелер жөндеуді қажет етсе, онда оларға басқа жатақханада орын бөлінетінін атап өтті.
Азамат Жұматаевтың айтуынша, бір жыл тұрған студенттің келесі жылы жатақханада қалу-қалмауы ол оқуға қабылданатын 1 курс студенттерінің санына байланысты.
«Өткен жылы біз 8 мыңнан астам студент қабылдадық. Барлық бірінші курс студенттері жатақханалармен қамтамасыз етілді. Ең алдымен, біз жетім балалар мен ата-анасының қамқорлығынсыз қалған балаларға, I және II топтағы мүгедектерге, бала кезінен мүгедектерге, сондай-ақ белсенді және жақсы үлгерімі бар студенттерге бөлмелер бердік.Биылғы жаңа оқу жылында біз сол қағиданы ұстанатын боламыз», - деді Студенттер үйінің директоры.
Сонымен қатар, келесі жаңа оқу жылында жатақхана ақысы қандай болатыны талқыланды. Студент Мөлдір Ибраева: «2023-2024 жылдары Студенттер үйінің тұру ақысы 150 000 теңгені құрады, жаңа оқу жылы оның бағасы өсуі мүмкін бе, егер студенттердің жаңа үйі салынса, 4 курсқа дейін білім алушылар қамтыла ма?», - деп сұрады. А. Жұматаев жауап бергендей, бағалар әзірге өзгеріссіз қалады, егер өзгерістер болған жағдайда ЖОО басшылығы студенттерді міндетті түрде хабардар етеді.
«Жатақхана құны осыдан екі жыл бұрын ғана өсті, бұған дейін ол көтерілмеген еді, ал студенттік төлем шығындарды толық өтемейді, тек 20 пайызын ғана жабады, ал қалғанын ЕҰУ төлейді. Бұған дейін Қазақстан үкіметі студенттерді жатақханаға орналастыру үшін арнайы қаржы бөліп келді, соның есебінен біздің студенттер жеке жатақханаға орналастырылды. Жаңа жатақхананың құрылысы толықтай пайдалануға берілсе, жоғары курс студенттерін баспанамен қамтуға мүмкіндік туады. Жалпы, барлық студенттерді баспанамен қамту мәселесі ЕҰУ кампусын бітірген соң шешіледі», – деп жауап берді Азамат Жұматаев.
Студенттер сонымен қатар жатақханада бос уақытты тиімді пайдалану үшін арнайы кабинет немесе зал ашуды, әртүрлі іс-шараларды өткізуге қаржылық көмек көрсетуді және т.б. сұрады. Азамат Жұматаев оның бәрі кезең-кезеңімен жүйелі түрде шешілетінін және кез келген уақытта студенттердің сұрақтарына жауап беруге дайын екенін жеткізді.