Жазушы Сапарғали Бегалин мұрасы
Қазақ әдебиетінің көрнекті өкілі, балалар әдебиетінің жазушысы және зерттеуші-фольклорист – Сапарғали Бегалин Ысқақұлының мемориалдық қорындағы еңбектері мен қолжазбаларынан «Жазушы Сапарғали Бегалин мұрасы» тақырыбында көрме ұйымдастырылды. Сапарғали Бегалин (1895-1983) Шығыс Қазақстан облысы, Абай ауданындағы, Дегелен ауылында дүниеге келген. Ол поэмалары, романдары, әңгімелері мен повестерімен танымал. Көрмеде поэзия мен проза жанрында қалам тербеген суреткердің ірі туындылары «Қыран кегі» (1943) және «Қыран туралы хикая» (1967) поэмалары, «Сәтжан» (1947), «Шоқан асулары» (1964), «Бала Шоқан» (1964) повестері, «Төлбасылар» (1947), «Ермектің алмасы» (1955), «Бақыт» (1956), «Жеткіншектер» (1960), «Мектеп түлектері» (1961), «Уақыт тынысы» (1968), «Қыран туралы аңыз» (1967) және басқа да жинақтары ұсынылған. Сонымен қатар 1910-1928 жылдардағы аласапыран кезең оқиғаларын қамтитын «Замана белестері» атты өмірбаяндық романының қолжазбасының төте жазумен жазылған түпнұсқасы, 2009-2011 жылдары жарияланған көптомдық шығармалар жинағының 7 томы қойылды. Сонымен қатар С. Бегалиннің 1940 жылдары жазылған Ағыбай батырды жырлаған «Тасарал» поэмасының қолжазбасы мен басқа да қатираларын көрмеден көре аласыздар.
Оқырман қауым, Сіздерді 16 қыркүйектен 31 қазанға дейін кітап көрмесімен танысуға шақырамыз. Көрме кітапхананың бас ғимаратының 3-қабатындағы фойеде орналасқан.