Әз-Наурыз-2024 онкүндігі: «Қайырымдылық күні» шарасы аталып өтті
Наурызнама-2024 онкүндігі аясында университетімізде күнделікті мәдени іс-шаралар ұйымдастырылуда. Бүгін №3 оқу корпусында «Қайырымдылық күні» аясында жәрмеңке және көрме өтті.
Мерекелік шараға ЕҰУ профессорлары Жандарбек Мәлібеков, профессор Серік Негимов бастаған Ақсақалдар алқасының мүшелері қатысып, професссор-оқытушылар мен сала қызметкерлерін және студент-жастарды Қайырымдылық күнімен құттықтады.
«Күн мен түн теңесетін Ұлыстың ұлы күні – Наурыз мейрамы биыл ерекше тойлануда. Күні кеше ғана «Амал» мерекесін атап өттік, бүгін Қайырымдылық күніне арналған шара өтіп жатыр. Барша әлемдегі ұлт пен ұлысты, ел мен елді теңестіретін көктемнің осы бір көзайым мейрамы Еуразия ұлттық университетін де ерекше көңіл-күйге бөлеп отыр. Қасиетті мейрам тағы да есігімізді ашып, төрімізге озғалы тұр: жақсылықтар мол болғай!», - дейді Сәулет-құрылыс факультетінің профессоры Жандарбек Мәлібеков.
Мерекелік шарада студенттердің салған суреттерінен арнайы көрме оқу ғимаратының бесінші және үшінші қабаттарында ұсынылды. Екінші қабатта ән айтылып, күй тартылып, ұлттық салт-дәстүр бойынша «Асық ату» ойыны ұйымдастырылды. Студенттер мен оқытушыларға Наурыз көже таратылып, ұлттық тағамдардан дастархан әзірленді.
Бұл игі шарадан факультеттің кафедралары да тыс қалған жоқ.
Алда Ұлыстың ұлы күні Наурыз мейрамы келе жатыр. Оған дейін ЕҰУ ұйымдастыратын «Шаңырақ» күні, «Ынтымақ» күні, «Ұлттық салт-дәстүр» күні, «Мәдениет және ұлттық ойын» күні секілді бірқатар маңызы мен мәні зор мерекелер күтіп тұр.