ЕҰУ студенттері Индонезияның ең көне және беделді жоғары оқу орындарының бірінде тағылымдамадан өтті

Л.Н.Гумилев атындағы Еуразия ұлттық университетінің алты факультетінің студенттері соның ішінде сәулет-құрылыс, ақпараттық технологиялар, физика-техникалық, халықаралық қатынастар, шетел филологиясы және жаратылыстану ғылымдары факультеті Индонезияның көркем Паданг қаласында орналасқан Андалас университетінде тағылымдаманы сәтті бітірді.

Бұл тағылымдама ақпан айында Австралияның Перт қаласында өткен APAIE 2024 конференциясы мен көрмесінде университеттер арасындағы келісімдердің арқасында ұйымдастырылды.

Тағылымдамадан өтуге барлығы 11 бакалавриат, магистратура және докторантура студенттері таңдалып, олар екі топқа бөлінді: бірінші топ 2-12 шілде аралығында, екінші топ 3-17 шілде аралығында тағылымдамадан өтті.

Ақпараттық технологиялар факультетінің студенттері Лаура Орынбай, Ергеш Манас, Асылжан Сванов және Жарқын Дәннар Андалас университетінің кітапханалары мен зертханаларында болды. Олар «Информатика» кафедрасының жергілікті жоғары курс студенттерінің Raspberry Pi, Jetson Nano және Arduino технологияларын қолдануға негізделген ғылыми жобаларымен танысты.

«Андалас университетіндегі тағылымдама біз үшін үлкен тәжірибе болды. Университет бізді жылы қарсы алды, университет қабырғасындағы білім беру жүйесімен және білім беру бағдарламаларымен таныстырды», - деп бөлісті студенттер.

Саяхат барысында Сәулет-құрылыс факультетінің студенттері Ақнұр Жанболатқызы, Армат Айсиев және Асхат Айсиев құнды білім мен тәжірибе алумен қатар, жергілікті сәулет және қала құрылысымен танысуға ерекше мүмкіндік алды.

«Бұл тағылымдама біздің кәсіби және жеке өсуімізге ықпал етті. Білікті ұстаздардан алған біліміміз бен тәжірибеміз біз үшін өте құнды болды».

Жаратылыстану факультетінің студенті Айым Құсайынова молекулалық биология, генетика, жануарлар физиологиясы зертханасында болды, сонымен қатар университеттегі зоология мұражайында болды. ЕҰУ студенті жергілікті студенттердің тропиктік жануарларды зерттеу бойынша практикалық сабақтарына қатысуға, бүкіл өмірін осы жәндіктерді зерттеуге арнаған көрнекті профессор «Көбелектердің атасымен» танысуға және тасбақа популяциясын қалпына келтірумен айналысатын ұйымға баруға мүмкіндік алды.

«Тәжірибелік іс-шараларға қатысу маған қоршаған ортаны қорғаудың маңыздылығын және мұндай ұйымдардың биологиялық әртүрлілікті сақтаудағы рөлін тереңірек түсінуге мүмкіндік берді. Тәжірибенің бұл бөлігі маған үлкен әсер қалдырды және жабайы табиғатты қорғау саласында әрі қарай жұмыс істеуге шабыттандырды», - деп бөлісті Айым.

Шетел филологиясы факультетінен Анель Аслялиева осы академиялық тағылымдамадан өту, университет оқытушыларымен және студенттерімен кездесу және қарым-қатынас жасау, конференциялар мен семинарларға қатысу оның академиялық және тұлғалық өсуіне үлкен ықпал еткенімен бөлісті.

«Мен үшін тек өз факультетім мен университетімді ғана емес, сонымен қатар өз елімді таныстыру үлкен мәртебе болды», - деді Анель.

Халықаралық қатынастар факультетінің магистранты Дильназ Есболатова тағылымдама аясында халықаралық қатынастардың тенденциялары, жаһандық саясаттың заманауи мәселелері, Орталық және Оңтүстік-Шығыс Азиядағы аймақшылдық, АСЕАН бойынша түрлі семинарлар мен шеберлік сабақтарына қатысты. Бұл оған магистрлік диссертацияны жазуға жаңа түсінік берді.

«Менің Андалас университетіндегі тағылымдамам ерекше саяхат болды. Әлеуметтік ғылымдар және саясат және халықаралық қатынастар факультеттерінің студенттері мен оқытушылары жылы қарсы алды, олардың достық қарым-қатынасы мен бір-бірімен өзара әрекеттесу арқылы ақпарат алмасуға және білім алуға деген шынайы ықыластары мені қатты таң қалдырды».

Физика-техникалық факультетінің докторанты Жұлдыз Жұмаділова тағылымдама барысында ядролық реакторлар физикасы, Ядролық реакторлар белсенді аймағының нейтрондық-физикалық есептеулерін жүргізу ерекшеліктері, қатты оксидті отын элементтерінің (ҚООЭ) құрамдас бөліктерін наноқұрылымдау мәселелері бойынша жұмыс кездесулері, семинарлар мен шеберлік сыныптары өткенін атап өтті. Монте-Карло әдісі бойынша есептеу кодын қолдану негіздері зерттелді, ЕҰУ негізінде ҚООЭ үшін жаңа электролиттің сипаттамаларын зерттеу, сондай-ақ бірлескен зерттеулер жүргізу мүмкіндігі туралы келісімдерге қол жеткізілді.

«Тәжірибе бағдарламасы өте қызықты және оқиғаға толы болды. Академиялық бөлімнен басқа бізге Батыс Суматраның тарихымен, мәдениетімен және табиғатымен танысуға бірегей мүмкіндік берілді. Біз керемет әдемі үйлену тойында қонақ болу құрметіне ие болдық, Падангтағы мәдени орталықтарды, аттракциондарды, мұражайлар мен мешіттерді араладық, аралдарға саяхат жасадық, тасбақаларды теңізге жіберуге арналған экологиялық іс-шараға қатыстық, сондай-ақ  Паданг қаласының үкіметі ұйымдастырған мерекелік кешкі асқа шақырылдық. Тағылымдама бағдарламасы өте қызықты және қарқынды болды. Тағылымдама Еуразия ұлттық университеті мен Андалас университеті арасындағы жемісті ғылыми ынтымақтастықтың бастауы болады деп сенемін».

Тағылымдама ЕҰУ студенттерінің оқу және кәсіби мансабындағы маңызды кезең болды, одан әрі жетістіктерге жету үшін жаңа көкжиектер ашты. Осындай халықаралық бағдарламаларға қатысу студенттер арасында жаһандық дүниетанымның қалыптасуына ықпал етеді, бұл қазіргі білім беру үдерісінің маңызды факторы болып табылады. Осылайша, ЕҰУ студенттері жаңа білім және әсерлер қоймасымен елге оралып қана қоймай, ЕҰУ мен Андалас университеті арасындағы академиялық ынтымақтастықтың негізін қалады. Жоспарларға бірлескен ғылыми зерттеулер жүргізу, академиялық алмасу, конференциялар мен семинарлар ұйымдастыру кіреді.

Андалас университеті Индонезиядағы ең көне және ең беделді университеттердің бірі болып саналады және Батыс Суматра провинциясының астанасы Паданг қаласында орналасқан. Университет сапалы білім беру және зерттеу мүмкіндіктерімен танымал, бұл оны халықаралық ынтымақтастық үшін тартымды серіктес етеді.