ЕҰУ профессоры АҚШ-та «500 ғалым» Болашақ бағдарламасы бойынша халықаралық тағылымдамадан өтті
Бейсенова Райхан Рымбайқызы, биология ғылымдарының докторы, Л.Н.Гумилев атындағы Еуразия ұлттық университетінің «Қоршаған ортаны қорғау саласындағы менеджмент және инженеринг» кафедрасының профессоры 2023 жылдың 21 тамызы мен 20 тамызы 2024 ж аралығында АҚШтың Мичиган мемлекеттік университетінің Ландшафттық экология және экожүйелердің ғылыми-зерттеу зертханасында «Болашақ» бағдарламасы бойынша «500 ғалым» халықаралық тағылымдамадан өтті.
Мичиган мемлекеттік университеті QS рейтингінде бүкіл әлем бойынша ауылшаруашылық университеттері арасында 14-ші орында. Университетте 50 000-нан астам студент бар және Мичигандағы ең ірі мемлекеттік университеттер арасында және Құрама Штаттардағы «ең жасыл» университеттердің бірі болып табылады.
Мичиган мемлекеттік университетінің география факультетінің Ландшафттық экология және экожүйені зерттеу зертханасын Р.Р.Бейсенованың тәлімгері болып табылатын профессор Jiquan Chen басқарады. Оның көптеген ғылыми жұмыстары климаттың өзгеруін зерттеуге арналған, сонымен қатар профессор Jiquan Chen NASA-ның климаттың өзгеруі бойынша көптеген жобаларының жетекшісі. Бейсенова Райхан Рымбайқызы қазіргі уақытта профессор Jiquan Chenмен экожүйенің климаттың өзгеруіне бейімделу механизмдерімен жұмыс істейді, су ресурстарының көлемін өзгерту арқылы климаттың жер үсті және жер асты суларының сапасына әсерін зерттейді. Ол сонымен қатар, судың транспирациясы мен булануын (Эвапотранспирация) қоршаған орта компоненттерімен есептеу арқылы су ресурстарын тиімді пайдалану үшін экожүйенің әлеуетін зерттейді. Қазақстанның су тапшылығы проблемасы бар ел екенін ескерсек, қазіргі уақытта экожүйелік әлеуеті мүлдем зерттелмеген. Қазақстан үшін бұл саланың маңызы зор. Мичиган мемлекеттік университетінде тағылымдамадан өту барысында Р.Р.Бейсенова 4 мақаласын жоғары сілтеме жасалған журналдарда жариялады және тағы 2 мақаланы баспаға дайындады.
Мичиган мемлекеттік университетінде тағылымдамадан өту кезінде тағылымдамадан өтушілер үшін оқу курстары да қарастырылған. Профессор Р.Р.Бейсенова қолданбалы зерттеулерге арналған R бағдарламалау тілін, сонымен қатар R Studio, SAS, Python сияқты бағдарламаларды пайдалана отырып, биофизикалық модельдер мен экожүйелік талдауды зерттеумен және меңгерумен айналысты. Біздің зерттеу ортамызда жаңа технологиялар, жасанды интеллектті білім мен ғылым саласына, әсіресе қолданбалы зерттеулер мен ғылымға енгізу өте маңызды. «Болашақ» бағдарламасының қазақстандық ғалымдарға беретін тәжірибесі баға жетпес құнды, өйткені ол зерттеушілер мен оқытушыларға әлемдік деңгейде ғылым мен білімнің жаңа бағыттары мен әдістерін ашуға мүмкіндік береді.