ЕҰУ мен Гарвард медицина мектебі (АҚШ) халықаралық жоба аясында Астанада мектеп психологтарына арналған тренинг өткізеді

Л.Н. Гумилев атындағы ЕҰУ психология кафедрасының меңгерушісі Әлия Мамбеталина және Гарвард университетінің өкілі, Бостон қаласындағы «Балалар ауруханасы» корпорациясының клиникалық қызметтер бойынша аға вице-президенті Майкл Гиллеспи консультациялық қызметтер туралы келісімге қол қойды.

БҰҰ-ның «Жақсы денсаулық және әл-ауқат» атты Тұрақты даму мақсаттарының үшінші бағытын жүзеге асыру аясында Қазақстан әр жастағы адамдардың салауатты өмір салтын қамтамасыз ету және амандығына ықпал ету міндеттемесін өз мойнына алды. Бұл, әсіресе, балалар арасында суицидтік мінез-құлық қаупінің алдын алу бағдарламаларын құру және іске асыру арқылы көрініс табуы мүмкін.

Жоба Гарвард медицина мектебінің ғылыми қызметкері, PhD докторы Саманта Аваданың және Л.Н. Гумилев атындағы ЕҰУ психология кафедрасының меңгерушісі, психология ғылымдарының кандидаты Әлия Мамбеталинаның жетекшілігімен жүзеге асырылуда. Жобаны қаржыландыруды Бостон балалар ауруханасының Жаһандық денсаулық сақтау бағдарламасы қамтамасыз етеді. Бұл бастама Қазақстандағы психологтардың суицидтің алдын алу және оны сүйемелдеу саласындағы әлеуетін нығайтуға бағытталған.

Жоба аясында балалар мен жасөспірімдердің психикалық денсаулығы саласындағы қызмет көрсетушілердің скрининг, бағалау және суицидке байланысты қауіпсіздік жоспарларын әзірлеу қажеттіліктері анықталады. Осы қажеттіліктерді бағалау және Қазақстан жағдайына бейімделген ғылыми негізделген қауіпсіздік жоспарлау модельдерін шолу негізінде доктор Авада, доктор Мамбеталина және доктор Кардели 2024 жылғы 15-16 желтоқсанда Астана қаласында мектеп психологтары үшін тренинг өткізеді.

Сонымен қатар, бұл жоба Қазақстан мектептеріндегі оқушылардың психикалық денсаулығы саласындағы көшбасшылармен жұмыс істеуге бағытталған. Олар деректер жинау әдістерін енгізуді талқылайды, бұл денсаулық сақтау жүйелерінде сапаны жақсарту құрылымын жасауға және суицидтің скринингі мен араласуының жаңа тәсілдерінің тиімділігін өлшеуге мүмкіндік береді.