ЕҰУ-да «Үш бәйтерек» апталығы аясында «Сәкен» фильм-кон¬церті көрсетілді

ЕҰУ-да «Үш бәйтерек» апталығы аясында әнші, актер, ақын, драматург Қанат Жүністің «Сәкен» фильм-кон­церті көрсетілді. ЕҰУ-дың Прездидент залында өткен драматургтың бұл туындысы өнер шаңырақ­тары әртістерінің қатысуымен, ел азамат­тарының де­меушілігінің арқасында түсі­ріліпті.

Фильм-концертті мемлекет және қоғам қайраткерлері, зиялы қауым өкілдері және профессор-оқытушылар мен студент-жастар тамашалады.

Автордың айтуынша, тұңғыш фильм-концерт тізбегі Сәкен әндерімен көмкеріліп, қайраткер өмі­рі­не қатысты маңызды ақ­па­раттармен әдіптелген.

«Фильм-концертте деректі және көркем киноның элементтері бар. С.Сейфуллиннің «Тау ішінде», «Біздің жақта», «Көк­шетау», «Ақсақ киік» әндерімен қоса, бұған дейін тек ақын түлеп-ұшқан топырақта ғана шыр­қалып келген әндер айтылады. Сонымен қатар  Сәкеннің жас кезіндегі ролін менің балам Біржан Жүніс ойнады», -деді автор.

Фильм-концертте жалғыз Сәкен емес, мұнда Ілияс пен Бейімбеттің образдары сомдалып, үш арыстың тұлғасы жарасымды көрініс тапқан.

Фильм-концерт аяқталған соң филология ғылымдарының докторы, профессор Серік Негимов сөз алып, өз  әсерімен бөлісті және ЕҰУ ректоры Ерлан Сыдықов әкелі-балалы актерлерге университет жастары атынан естелік- сый табыс етті.

Соңы естелік суретке түсумен аяқталды.