ЕҰУ Химия кафедрасының делегациясы ғылыми ынтымақтастықты нығайту мақсатында Е.А. Бөкетов атындағы Қарағанды университетіне барды.

2025 жылғы 13 қаңтарда Л.Н. Гумилев атындағы ЕҰУ Химия кафедрасының меңгерушісі Эльдар Ертаевич Копишев пен оқытушы-зерттеуші Руслан Заирович Сафаров «8D05306 Химия» білім беру бағдарламасының докторанттары Байкенов Е.А. және Сабитов А.-мен бірге Е.А. Бөкетов атындағы Қарағанды университетіне барды.  

Сапардың негізгі мақсаты – ҚарУ-дың заманауи құрылғылар базасында бірлескен зерттеулер жүргізу, ғылыми байланыстарды нығайту және университеттер арасында ұзақ мерзімді серіктестік орнату болды.  

Қарағанды университеті тарапынан делегацияны ғылым жөніндегі проректор Еркеблан Мұратұлы Тажбаев пен химия факультетінің деканы Марат Кірімбайұлы Ибраев қарсы алды. Қонақтарға университеттің құрылғылар паркіне экскурсия ұйымдастырылып, заманауи ғылыми жабдықтар мен ҚарУ ғалымдары жүргізетін негізгі зерттеу бағыттары көрсетілді.  

Сапар барысында қатысушылар бірлескен ғылыми жобалардың болашағын, соның ішінде екі жақтың құрылғылар базасын пайдалану мүмкіндіктерін, сондай-ақ жарияланымдар мен жоғары білікті мамандар даярлау саласындағы ынтымақтастықты талқылады.  

Қарағанды университетіне жасалған сапар ғылыми ынтымақтастықты нығайту және серіктестік байланыстарды кеңейту жолындағы маңызды қадам болды. Бұл алдыңғы қатарлы зерттеулер жүргізу және химия саласында жоғары білікті мамандар даярлау үшін жаңа мүмкіндіктер ашады.