ЕҰУ профессоры Ляйля Муталиева Ұлыбританиядағы Суррей университетінде ғылыми тағылымдамадан өтті

Еуразия ұлттық университетінің экономика факультетінің «Туризм» кафедрасының профессоры Ляйля Муталиева Суррей университетінде (Ұлыбритания) ғылыми тағылымдамада «жасыл» әйелдер кәсіпкерлігі саласында тәжірибелік тәжірибе жинақтады.

Тағылымдама барысында ол кәсіби білімін тереңдетуге және практикалық дағдылар алуға бағытталған бірқатар іс-шараларға қатысты. Сонымен қатар, тағылымдама жетекшісі, Суррей университетінің Туризм және қонақжайлылық менеджменті кафедрасының қауымдастырылған профессоры, PhD Вячеслав Филимоновпен жеке кеңесулер өткізілді.

Тағылымдама аясында жетекшінің басшылығымен «International Hospitality Management» мамандығының студенттеріне арналған «Қонақжайлылық операцияларын талдау» тақырыбында семинар өткізілді. Сонымен қатар «Туризм және қонақжайлылық саласындағы «жасыл» әйелдер кәсіпкерлігі» тақырыбында семинар ұйымдастырылды. Зерттеудің негізгі нәтижелері туристік бизнеске әйелдер кәсіпкерлігін тарту және бизнес-процестерді іске асыру аясында гендерлік теңдікті қалыптастыру бойынша ұсыныстар әзірлеуге теориялық және практикалық негіз болды.

Сонымен қатар, Ляйля Муталиева бірнеше семинарға қатысып, кәсіби байланыстарын кеңейтуге, жаңа білім алуға және өзекті мәселелерді талқылауға мүмкіндік алды.

Атап айтқанда, ол Мадридтегі Хуан Карлос Королі университетінің оқытушысы, «жасыл» адами ресурстарды басқару және орнықты даму саласына маманданған Лидия Мурильо-Рамостың «Қонақжайлылық саласында “жасыл” мінез-құлықты қалыптастыру: құштарлық пен зейіннің “жасыл” HRM-дегі рөлі» атты семинарына қатысты.

Оңтүстік Қытай технологиялық университетінің Туризм менеджменті мектебінің PhD докторанты Ронгронг Лю өткізген семинар да танымды болды. Семинар барысында ол цифрлық инфрақұрылым мен туризм дамуы туралы баяндама жасап, цифрлық инфрақұрылым құрылысының туризмнің дамуына қалай әсер ететініне ерекше назар аударды.

«Hospitality NOW: Адам тәжірибесіне арналған дизайн стратегиялары» атты семинарда Gensler компаниясының Еуропа бойынша қонақжайлылық бағытының жетекшісі, аға заңгер Тревор То қонақжайлылық дизайнының қонақтар тәжірибесін жақсартуға бағытталған стратегиялары туралы ақпарат ұсынды. Семинар барысында адам тәжірибесіне арналған дизайн стратегиялары талқыланып, қонақжайлылық саласына ерекше назар аударылды.

Ляйля Муталиева Бирмингем қаласындағы NEC көрме орталығында өткен Show Flexible, Sustainable & Decentralized Energy Solutions (The Distributed Energy) халықаралық көрмесі мен конференциясына да қатысты. Бұл шараға энергия тұтынушылары, желі операторлары және басқа да мүдделі тараптар жаңа технологияларды іс жүзінде көру үшін жиналды.

ETOA – Еуропалық туристік қауымдастықтың бас хатшысы Тим Фэйрхерст шақырылған зерттеушілер, докторанттар мен магистранттарға арналған семинар өткізді. Семинар Еуропадағы туризмнің тұрақты өсу тақырыбына арналды. Онда Еуропалық туристік қауымдастықтың визалық реформалар арқылы сапарларды жеңілдетудегі рөлі, орнықтылықты ілгерілету, цифрлық трансформацияны дамыту, пандемиядан кейінгі қалпына келуді қолдау және саланы өркендету үшін қажетті инфрақұрылыммен қамтамасыз ету мәселелері талқыланды.

Гринвич университетінде (University of Greenwich) академиялық пәндер жетекшілері және Халықаралық ынтымақтастық департаментінің өкілдерімен кездесу өтті. Кездесу барысында университеттер арасындағы ынтымақтастық мәселелері талқыланды, сондай-ақ білім беру және ғылыми-зерттеу салаларындағы бірлескен қызметке бағытталған мүмкіндіктерді нақтылау және нақты қадамдарды айқындау үшін келесі кездесулер жоспарланды.

Ұлыбританиядағы Эссекс университетінің интернационалдандыру және әріптестік департаментінің директоры Рекха Рао-Николсонмен өткен кездесуде бірлескен ғылыми зерттеулер, академиялық ұтқырлық, сондай-ақ жасыл экономикаға және білім беру саласына тән басқа да бағыттарға байланысты өзара ынтымақтастық мүмкіндіктері мен жобаларды жүзеге асырудың ғылыми мәселелері талқыланды.

Сондай-ақ Кембридж қаласындағы Англия Рускин университетінің Менеджмент мектебінің жетекшісі, профессор Надем Халидпен кездесу өтті. Кездесу барысында Еуразия Ұлттық Университетіндегі «Лидерлік және корпоративтік басқару» ЕМВА/МВА бағдарламасы бойынша одан әрі ынтымақтастық мәселелері талқыланды. Оның ғылыми-зерттеу қызметі кәсіпкерлік, инновациялар, орнықты даму, көшбасшылық және кәсіпкерлік білім беру салаларына бағытталған. Кездесу кезінде халықаралық коллаборацияны дамыту, ЕМВА бағдарламасының форматы мен оқу шарттары, сондай-ақ бірлескен бағдарлама мен қос дипломды жүзеге асыру мәселелері қаралды.

«Мен “500 ғалым” бағдарламасы аясында тағылымдамадан өттім. Бұл бағдарлама қазіргі мәселелер мен тәсілдерді анықтауға ғана емес, сонымен қатар оларды халықаралық тұрғыдан тереңірек талдауға мүмкіндік берді, бұл менің әлеуметтік ғылымдар саласындағы менеджмент бойынша тағылымдама шеңберіндегі зерттеуім үшін аса маңызды болды. Тағылымдама барысында нақты тәжірибелер, кедергілер мен мүмкіндіктер бойынша деректер жиналып, Қазақстанда және жаһандық үрдістерді ескере отырып “жасыл” әйелдер кәсіпкерлігін дамыту бойынша ұсыныстар әзірленді. Қазіргі әдістемелерді игеру тек теориялық білімімді тереңдетіп қана қоймай, сонымен қатар “жасыл” әйелдер кәсіпкерлігін дамыту үшін тиімді пайдалануға болатын практикалық құралдарды қалыптастыруға мүмкіндік берді. Тағылымдама нәтижелері Қазақстанның туризм және қонақжайлылық секторына инновациялық тәсілдерді енгізудің келешегін ашады және бұл өз кезегінде өңірдің тұрақты дамуы мен бәсекеге қабілеттілігін арттыруға септігін тигізеді», - деп Ляйля Муталиева өз әсерімен бөлісті.