Төрт елден 130-дан астам жас зерттеуші Астанада өткен «XXI ғасырдағы орыс тілі» конференциясына қатысты

Теориялық және қолданбалы лингвистика кафедрасы (кафедра меңгерушісі - Е.Журавлева) үшін ақпан айы соңғы 13 жыл бойы «XXI ғасырдағы орыс тілі: жас зерттеушілердің ізденістері» атты Халықаралық студенттік ғылыми конференциясын өткізумен ерекшеленіп келеді (жауапты ұйымдастырушы – Г.Самсенова). Аталған конференция Л. Н. Гумилев атындағы Еуразия ұлттық университетінің ғылыми іс-шаралар жоспарына енгізілген.

2026 жылы конференцияның тең ұйымдастырушылары ретінде Сургут мемлекеттік педагогикалық университеті, Омбы мемлекеттік педагогикалық университеті және Оңтүстік федералдық университеті қатысты. Конференция қазақстандық және шетелдік студенттер үшін көптен күткен маңызды ғылыми алаңға айналды. Ал мақалалары РИНЦ дерекқорында постатейлік түрде индекстелетін конференция жинағы осы ғылыми шараның айрықша белгісіне айналды.

Конференцияға Қазақстанның (Астана, Петропавл, Талдықорған, Шымкент), Ресейдің (Мәскеу, Сургут, Тула, Елец, Ростов-на-Дону, Қазан, Красноярск, Омбы, Иваново, Чебоксары, Якутск), Әзербайжанның (Баку) және Қытайдың жоғары оқу орындарынан 130-дан астам студент қатысты. Конференция аралас (офлайн-онлайн) форматта өтті. Офлайн қатысу үшін Сургут, Омбы (Ресей) және Петропавл (Қазақстан) қалаларынан студенттер арнайы келді.

Конференцияның ашылу салтанатында тең ұйымдастырушы жоғары оқу орындарының басшылығы студенттерге құттықтау сөз арнады: ЕҰУ филология факультетінің деканы С.Дүйсеңғазы, Сургут мемлекеттік педагогикалық университетінің ректоры В.Засыпкин, СурГПУ филология факультетінің деканы Н.Ганущак, Омбы мемлекеттік педагогикалық университетінің орыс тілі және лингводидактика кафедрасының меңгерушісі Е.Виданов, Оңтүстік федералдық университетінің шетел тілі ретінде орыс тілі және оны оқыту әдістемесі кафедрасының меңгерушісі З.Режук, Теориялық және қолданбалы лингвистика кафедрасының меңгерушісі Е.Журавлева.

Омбы қаласынан келген студенттер ОмГПУ ректорының атынан филология факультетінің деканы С. Дүйсеңғазыға Алғыс хатты салтанатты түрде табыс етті.

Теориялық және қолданбалы лингвистика кафедрасының меңгерушісі, профессор Е.Журавлева конференцияға қазақстандық және шетелдік жоғары оқу орындары студенттерінің қызығушылығы жыл сайын артып келе жатқанын, ғылыми жұмыстардың өзіндік ерекшелігі мен түпнұсқалылығы жоғары деңгейде екенін, сондай-ақ кафедраның халықаралық байланыстарының тұрақты түрде кеңейіп отырғанын атап өтті.

Пленарлық отырыста баяндамалармен келесі студенттер сөз сөйледі: Аврора Логинова (Ресей, Сургут қ.), Асыл Исламова (Қазақстан, Астана қ.), Андрей Крекнин (Ресей, Омбы қ.) және Анастасия Симакова (Ресей, Ростов-на-Дону қ.). Барлық баяндамалар аудитория тарапынан зор қызығушылық тудырды.

8 секциялық отырыстар барысында қатысушылар өз ғылыми зерттеулерін таныстырып, презентациялар жасап, қойылған сұрақтарға жауап берді.

Секция модераторлары мен қазылар алқасының мүшелері ретінде ЕҰУ-ден филология ғылымдарының докторлары Ш.Жаркынбекова, Ж.Джамбаева, педагогика ғылымдарының кандидаттары Б.Галиева, Б.Асмагамбетова, PhD доктор Ж.Селиверстова, филология ғылымдарының кандидаттары А.Нургазина, М.Шарипова, PhD доктор М.Логинова қатысты. Әр секцияда Астана, Сургут, Омбы және Ростов-на-Дону қалаларынан келген ғалымдардан құралған халықаралық қазылар алқасы жұмыс істеді.

Қазылар алқасы мүшелері үздік зерттеулерді анықтау оңай болмағанын атап өтті, себебі барлық баяндамашылар ғылыми материалды терең меңгергенін көрсетті, ғылыми деректерді дербес талдап, қорытынды жасауда жоғары деңгей танытты және пікірталастарға белсенді қатысты.

Секциялық жұмыстар аяқталғаннан кейін шетелдік студенттер мәдени бағдарлама аясында Л.Н. Гумилев атындағы ЕҰУ мұражайларын аралап, сондай-ақ Астана қаласының көрікті жерлерімен танысты.

Конференцияның екінші күні Қорытынды пленарлық отырыс өтті. Онда секция төрағалары жұмыс қорытындыларын шығарып, үздік ғылыми жұмыстардың авторларын жариялады. Жеңімпаздар дипломдармен марапатталды, сондай-ақ әр номинация бойынша ерекше көзге түскен қатысушыларға грамоталар табысталды.

Барлық қатысушылар конференцияның жоғары деңгейде өткенін және әртүрлі елдердің студенттері арасындағы ғылыми қарым-қатынастың ұмытылмас сәттерін сыйлағанын атап өтті.

Барлық қатысушыларды ғылыми зерттеулерін табысты қорғауларымен құттықтаймыз және 2027 жылы қайта кездесуді асыға күтеміз!