Тарих факультетінде педагогикалық шеберлік мектебінің мәжілісі өтті

2026 жылғы 10 сәуірде Тарих факультетінде педагогикалық шеберлік мектебінің кезекті отырысы өтіп, онда қазіргі жоғары білім беру жүйесіндегі өзекті мәселелерге арналған баяндамалар ұсынылды.

Алғашқы «Оқу үдерісі және ғылыми-зерттеу жұмысында жасанды интеллектті қолдану: тарихи дереккөздерді талдау» атты баяндама жасалған интеллектіні оқу үдерісі мен ғылыми зерттеуде қолдану мәселелеріне арналды. Баяндамашы — Қазақстан тарихы кафедрасының профессоры, тарих ғылымдарының докторы Мақсат Алпысбес. Өз сөзінде ол тарихи білім беру мен зерттеу қызметіндегі жасанды интеллектінің заманауи мүмкіндіктерін қарастырып, оның тарихи дереккөздерді талдаудағы, қолжазбаларды тану мен транскрипциялаудағы, библиографиялық мәліметтерді жүйелеудегі, мәтіндік және визуалды материалдарды өңдеудегі, сондай-ақ архив, музей және мәдени мұра салаларындағы маңызын атап өтті. Сонымен қатар цифрландыру мен жаһандық ақпараттық кеңістік жағдайында жасанды интеллектінің тарихшының зерттеушілік мүмкіндіктерін кеңейтетін тиімді құрал ретіндегі рөліне ерекше назар аударылды.

Екінші «Эмоциялық интеллект және академиялық күйзеліс: жоғары оқу орындарының мұғалімдеріне арналған алдын алу стратегиялары» атты баяндаманы археология және этнология кафедрасының аға оқытушысы, тарих ғылымдарының кандидаты Г.К. Кожакметова ұсынды. Баяндамада академиялық күйзелістің мәні, оның негізгі себептері мен оқытушының кәсіби қызметіндегі көріністері жан-жақты ашылып, эмоциялық интеллектінің педагогтің кәсіби тұрақтылығын қамтамасыз етудегі маңызды ресурс екені көрсетілді. Баяндамашы күйзелістің алдын алуға бағытталған тұлғалық, кәсіби және ұйымдастырушылық стратегияларды, атап айтқанда, өзін-өзі реттеу дағдыларын дамыту, саналылықты қалыптастыру, уақытты тиімді басқару, әріптестік қолдау ортасын нығайту және бюрократиялық жүктемені азайту жолдарын ұсынды.

Мәжіліс барысында қатысушылар оқыту сапасын арттыру, кәсіби ынтаны сақтау және білім беру үдерісіне заманауи тәсілдерді енгізу жолдарын талқылады. Ұсынылған баяндамалар факультет оқытушыларының қызығушылығын тудырып, тәжірибе алмасуға және жоғары мектептің өзекті мәселелерін талқылауға арналған маңызды алаңға айналды.