ЕҰУ-да Күміс университетінің тыңдаушыларына арналған табиғи жасару бойынша практикалық курс өтті

Үздіксіз білім беру институты Күміс университет тыңдаушыларына арналған «Фейс-фитнес: табиғи жасару» курсын өткізді.

Аталған білім беру іс-шарасы егде жастағы азаматтардың өмір сапасын арттыруға және белсенді ұзақ өмір сүруін қамтамасыз етуге бағытталды. Курс барысында қатысушылар өзін-өзі күтудің заманауи, дәрі-дәрмексіз тәсілдерін меңгерді.

Лектор ретінде Тота Токтасынова қатысушыларға инъекциялық және хирургиялық араласусыз бет терісінің жастығы мен серпімділігін сақтаудың ғылыми негізделген әрі қауіпсіз әдістерін таныстырды. Бағдарлама практикалық бағытта құрылып, бет бұлшықеттерін нығайтуға, қан айналымы мен лимфодренажды жақсартуға арналған жаттығулар кешенін меңгеруді, сондай-ақ күнделікті күтім дағдыларын қалыптастыруды қамтыды.

Курстың ерекшелігі – практикалық сабақтардың «Aru massage» орталығы базасында өткізілуі болды. Мұнда фейс-фитнес әдістерін толыққанды меңгеруге қолайлы жағдай жасалды. Қатысушыларға арнайы жұмыс орындары, оның ішінде кушеткалар мен кәсіби күтім құралдары ұсынылып, дағдыларды тәжірибеге барынша жақын жағдайда пысықтауға мүмкіндік берілді.

Тыңдаушылар курс мазмұнының тереңдігін, оның практикалық маңыздылығын және оқытушының кәсібилігін жоғары бағалады.

Назира Абдулаева атап өтті: «Үздіксіз білім беру институтына аға буынға арналған оқытуды ұйымдастырғаны үшін алғыс білдіреміз. Фейс-фитнестің бет бұлшықеттеріне әсері туралы алған біліміміз, жағымды эмоциялар мен көрінетін нәтиже бұл курстың құндылығын арттыра түсті».

Нагима Кисыкова өз пікірінде: «Сабақтардың практикалық бағыттылығы, жеке көзқарас және лектор мен мамандармен бірлесіп жұмыс істеу мүмкіндігі бет бұлшықеттерін нығайтуға арналған тиімді жаттығуларды терең меңгеруге мүмкіндік берді», – деді.

Ынта Жармұхамедова атап өтті: «Сабақ барысындағы сенімді әрі жылы атмосфера, мұқият көзқарас және мазмұнның сапалылығы пайдалы дағдыларды игеруге ғана емес, жалпы көңіл-күйдің жақсаруына да ықпал етті».

Оқу қорытындысы бойынша қатысушылар табиғи жасарудың қолжетімді әрі тиімді әдістерін меңгеріп, оларды күнделікті өмірде қолдануға мүмкіндік алды.

Мұндай білім беру бастамаларын жүзеге асыру Үздіксіз білім беру институты қызметінің өмір бойы сапалы әрі қолжетімді білім алуға жағдай жасауға бағытталған стратегиялық ұстанымын айқындайды. Күміс университет тыңдаушыларымен жүргізілетін жұмыс «Ұрпақтар диалогы» жобасы аясында белсенді ұзақ өмір сүру мәдениетін дамытуға және ұрпақаралық өзара іс-қимылды нығайтуға ықпал етеді.