ЕҰУ профессоры Жанат Аймұхамбет жас ғалымдарды семиотикалық талдау әдістерімен таныстырды

Л.Н. Гумилев атындағы Еуразия ұлттық университетінде «Ғылыми зерттеу әдіснамасы» пәні аясында филология ғылымдарының докторы, профессор, оқытушы-зерттеуші Жанат Аймұхамбеттің «Әдебиеттанудағы семиотикалық талдау» тақырыбындағы ғылыми семинары өтті. Аталған шара жас зерттеушілердің ғылыми ізденістерін жетілдіруге және әдебиеттанудағы заманауи әдіснамалық бағыттармен таныстыруға арналды.

Семинар барысында ғалым семиотика ғылымының қалыптасу тарихына кеңінен тоқталып, оның негізгі теориялық ұстанымдары мен зерттеу нысандары туралы жан-жақты мәлімет берді. Сонымен қатар семиотиканың құрылымдық лингвистика, мәдениеттану, философия және әдебиеттану ғылымдарымен байланысы сөз болып, оның қазіргі гуманитарлық ғылымдар жүйесіндегі орны мен маңызы талқыланды. Семиотикалық талдаудың бастауында тұрған ғалымдардың еңбектері мен олардың ғылыми тұжырымдарына шолу жасалып, семиотикалық зерттеулердің бүгінгі даму бағыттары сараланды.

Профессор Жанат Аймұхамбет әдеби мәтінді талдаудағы таңба, код, символ, мән және мағына секілді негізгі ұғымдардың қызметін нақты мысалдар арқылы түсіндірді. Әсіресе көркем шығармалардағы астарлы ойды, ұлттық-мәдени кодтарды және авторлық дүниетанымды ашуда семиотикалық әдістің тиімділігіне ерекше назар аударылды. Ғалым әдеби мәтінді көпқабатты құрылым ретінде қарастырудың маңызын атап өтіп, семиотикалық талдау арқылы шығармадағы жасырын мағыналарды анықтаудың жолдарын көрсетті.

Семинардың маңызды бөлігінің бірі жас зерттеушілерге арналған практикалық ұсыныстар болды. Баяндамашы докторанттар мен магистранттарға ғылыми зерттеу жұмыстарында семиотикалық әдісті қолданудың ерекшеліктері туралы айтып, диссертациялық зерттеулерде бұл тәсілдің мүмкіндіктерін түсіндірді. Сонымен қатар әдебиеттанудағы қазіргі ғылыми бағыттар мен пәнаралық зерттеулер контексінде семиотикалық талдаудың өзектілігіне тоқталды.

Шара барысында қатысушылар өздерін қызықтырған сұрақтарын қойып, тақырып төңірегінде пікір алмасты. Ғылыми пікірталас барысында семиотикалық талдаудың теориялық және практикалық қырлары талқыланып, зерттеу тәжірибесіндегі қолданылу ерекшеліктері жөнінде құнды ойлар айтылды. Қатысушылар семинардың мазмұны ғылыми-зерттеу жұмыстарына жаңа серпін беріп, әдеби мәтінді талдаудың тың мүмкіндіктерін танытқанын атап өтті.

Семинарға Қазақ әдебиеті кафедрасының докторанттары мен магистранттары, сондай-ақ ғылыми ізденіске қызығушылық танытқан білім алушылар қатысты. Танымдық әрі мазмұнды өткен ғылыми кездесу қатысушылардың семиотика саласындағы білімдерін тереңдетіп, әдебиеттанудың заманауи зерттеу әдістерін меңгеруге ықпал етті.