Бірінші түлектер легі «Аударма ісі» бірлескен білім беру бағдарламасы бойынша диплом жұмыстарын сәтті қорғады

2026 жылғы 2 маусым күні Л.Н. Гумилев атындағы Еуразия ұлттық университетінің Аударма теориясы мен практикасы кафедрасында Ош мемлекеттік университетімен 2022 жылдан бері бірлесіп жүзеге асырылып келе жатқан «Аударма ісі» білім беру бағдарламасының алғашқы түлектері дипломдық жұмыстарын қорғады.

Бұл маңызды академиялық оқиға екі жоғары оқу орны арасындағы халықаралық ынтымақтастықтың табысты нәтижесі болып табылады. Бағдарлама аударма саласы мен мәдениетаралық коммуникация бағытында бәсекеге қабілетті, жоғары білікті мамандар даярлауға бағытталған.

Қорғау барысында студенттер теориялық білімдерінің жоғары деңгейін, практикалық аударма дағдыларын және әртүрлі мәтіндермен, мәдени контексттермен жұмыс істеу қабілеттерін көрсетті. Қорытынды нәтижелер бірлескен білім беру моделінің тиімділігін және түлектердің кәсіби әлеуетінің жоғары екенін дәлелдеді.

Бағдарламаны жүзеге асыру Аударма теориясы мен практикасы кафедрасы мен Ош мемлекеттік университетінің тығыз ынтымақтастығы арқасында мүмкін болды.

Кафедра ұжымы түлектерді диплом жұмыстарын сәтті қорғауымен құттықтап, оларға кәсіби табыс, жаңа жетістіктер және аударма саласында жарқын мансап тілейді.