Қылмыстық-құқықтық пәндер кафедрасының магистранттары Шанхай халық өкілдері жиналысының қызметімен танысты

2026 жылғы 28 мамырда Қытай Халық Республикасының Шанхай қаласында Л.Н. Гумилев атындағы Еуразия ұлттық университеті Қылмыстық-құқықтық пәндер кафедрасының «7М04209 – Сот сараптамасы» білім беру бағдарламасының магистранттары Асхатова Бахтыгүл мен Кужахметова Гульнур «Шанхай ынтымақтастық ұйымы жастары – 2026» халықаралық жоғары білікті мамандар даярлау жобасы аясында ұйымдастырылған «Халық өкілдері жиналысының қызметімен танысу» бағдарламасына қатысты.

Кездесу Шанхай қалалық Халық өкілдері жиналысы Тұрақты комитетінің ғимаратында өтті. Бағдарламаға Қазақстан, Ресей, Беларусь, Пәкістан және Иранды қоса алғанда жеті мемлекеттен келген 22 тыңдаушы қатысты. Іс-шараның негізгі мақсаты шетелдік студенттер мен жас мамандарды Қытайдың саяси жүйесінің ерекшеліктерімен, мемлекеттік басқару тетіктерімен және халық өкілдігі қағидаттарымен таныстыру болды.

Сапар барысында қатысушылар Шанхай халық өкілдері жиналысының құрылымы мен негізгі қызмет бағыттарын, депутаттық корпустың жұмыс ерекшеліктерін, жергілікті заң шығару жүйесін, сондай-ақ мемлекеттік органдардың халықпен өзара іс-қимыл тетіктерін зерделеді. Заң шығару қызметі, парламенттік бақылау, кадр саясаты және Шанхайдың әлеуметтік-экономикалық дамуы мәселелеріне ерекше назар аударылды.

Қатысушылар алдында Шанхай халық өкілдері жиналысының Сыртқы істер комитеті төрағасының орынбасары Ван Чжипин құттықтау сөз сөйледі. Ол өз сөзінде халықаралық жастар ынтымақтастығының маңыздылығын атап өтіп, мұндай кездесулер мемлекеттер арасындағы өзара түсіністікті нығайтуға және мемлекеттік басқару саласындағы тәжірибе алмасуға ықпал ететінін жеткізді.

Пікірталас сессиясы аясында қатысушылар Шанхай билік органдарының өкілдеріне сұрақтар қою мүмкіндігіне ие болды. Талқылау барысында заң шығарушы және атқарушы органдардың өзара іс-қимылы, жастар саясатын дамыту, құқықтық жүйені жетілдіру және халықаралық ынтымақтастықтың перспективалары мәселелері қарастырылды.

«7М04209 – Сот сараптамасы» білім беру бағдарламасы магистранттарының аталған бағдарламаға қатысуы академиялық және кәсіби алмасудың маңызды кезеңіне айналып, Қытай Халық Республикасының мемлекеттік институттарының қызметімен тәжірибелік тұрғыда танысуға, сондай-ақ Шанхай ынтымақтастық ұйымына мүше мемлекеттер арасындағы халықаралық байланыстарды кеңейтуге мүмкіндік берді.

Осындай халықаралық бастамалар мәдениетаралық диалогты дамытуға, мемлекеттер арасындағы білім беру байланыстарын нығайтуға және жас мамандардың заманауи саяси-құқықтық үдерістерді терең түсінуіне ықпал етеді.