ЕҰУ-да Қазақстанның әлеуметтік қызметкерлерін оқытудың үшінші ағымы аяқталды

Л. Н. Гумилев атындағы Еуразия ұлттық университетінде әлеуметтік қорғау жүйесінің әлеуметтік қызметкерлерінің біліктілігін арттыру және қайта даярлау курстарының ауқымды бағдарламасының үшінші ағымы сәтті аяқталды. Бағдарламаны Қазақстан Республикасы Еңбек және халықты әлеуметтік қорғау министрлігінің тапсырысы бойынша Үздіксіз білім беру институты іске асырды.

Оқытуға Қазақстанның түрлі өңірлерінен 85 әлеуметтік сала мамандары қатысты. Бағдарлама әлеуметтік қызметкерлердің кәсіби құзыреттерін жетілдіруге, заманауи тәсілдерді енгізуге және халықтың әртүрлі санаттарымен әлеуметтік жұмыстың тиімді технологияларын игеруге бағытталған. Оқыту әлеуметтік сала мамандарының кәсіби қызметіне қойылатын заманауи талаптарды ескере отырып, әлеуметтану кафедрасы әзірлеген қайта даярлау мен біліктілікті арттырудың жаңартылған бағдарламалары бойынша жүргізілді. Бағдарламаларды іске асыруға әлеуметтану кафедрасының оқытушылары: Құралай Мұхамбетова, Аяжан Қуатова, Жұлдыз  Сембина, Динара Досмурзаева және Гүләзия Исахова қатысты.

Оқыту барысында тыңдаушылар клиентті дамытудың жеке жоспарын әзірлеу, кәсіби сұхбат жүргізу, әлеуметтік қызмет алушылардың мүддесі үшін ведомствоаралық өзара іс-әрекетті ұйымдастыру алгоритмдерін игерді және еліміздің әртүрлі өңірлеріндегі әріптестерімен кәсіби тәжірибе алмасты.

Оқыту қорытындысы бойынша қатысушылар әлеуметтік көмекті ұйымдастырудың заманауи тәсілдері туралы білімдерін кеңейтті, кәсіби коммуникация және клиенттерді сүйемелдеу дағдыларын нығайтты, сондай-ақ күнделікті жұмысында қолдануға арналған практикалық құралдарды алды.

Үшінші ағымды іске асыру бағдарламаға сұраныстың жоғары деңгейін және оның әлеуметтік қорғау жүйесінің кадрлық әлеуетін дамыту үшін маңыздылығын растайды. Бүкіл ел бойынша әлеуметтік қызметкерлердің біліктілігін арттыру бойынша ауқымды жұмыс жалғасатын болады, бұл әлеуметтік жұмыстың заманауи стандарттарын енгізуге және Қазақстан халқы үшін әлеуметтік қызметтердің сапасын арттыруға ықпал етеді.