Биология мамандығының студенттері Қорғалжын мемлекеттік қорығында – 2026

Жалпы биология және геномика кафедрасының «6В05107 – Биология» білім беру бағдарламасының 2-курс студенттері 2026 жылғы 8 мен 14 маусым аралығында Қорғалжын мемлекеттік табиғи қорығының аумағында зоология бойынша жазғы оқу-далалық практикасынан өтті.

Қорғалжын кентінде студенттер қорықтың визит-орталығы мен табиғат мұражайында болып, оның тарихымен және фаунасымен танысты. Қорғалжын мемлекеттік табиғи қорығы ЮНЕСКО-ның Бүкіләлемдік мұра тізіміне енгізілген, ал оның аумағында орналасқан Теңіз-Қорғалжын көл жүйелері Қазақстандағы және бүкіл Азиядағы жыл құстары үшін ең маңызды сулы-батпақты алқаптардың бірі болып табылады. Қорық Астана қаласынан оңтүстік-батысқа қарай небәрі 130 шақырым жерде орналасқан және өзінің көлді-далалы кеңістігімен әрі алуан түрлі фаунасымен танымал. Осының бәрі оны зоология бойынша далалық практиканы өткізуге таптырмас тамаша орынға айналдырады.

Л.Н. Гумилев атындағы Еуразия ұлттық университеті мен Қорғалжын мемлекеттік табиғи қорығы арасында көптеген жылдар бойы ынтымақтастық туралы шарт жұмыс істеп келеді. Қорық басшылығы кезекті рет 2-курс студент-биологтарын өз аумағында қабылдауға ниет білдіріп, практикаға қажетті барлық жағдайды жасап берді. Студенттер Сұлтанкелді көлінің көркем жағалауында орналасқан Қаражар кордонындағы жайлы үйлерге орналасты.

Күн сайын студенттер таң ата тұрып, қорық бойынша экскурсияға шықты, онда жануарлардың көптеген түрлерін кездестірді.

Әсіресе құстар фаунасы өте бай болды. Түрлі құстарды, олардың реңі мен мінез-құлқын тікелей табиғи ортада бақылаудың сәті түсті. Көлдерде, далада және әуеде қызғылт қоқиқаз, аққулар, қаздар, бірқазандар, үйректер мен балшықшылардың түр-түрі, үлкен ақ құтан, суқұзғындар және басқа да көптеген құстар кездесті.

Биыл студенттердің жабайы сүтқоректілерді көру жолында жолы болды. Студенттер тұрып жатқан аумаққа кәдімгі жабайы қабан жақындап келеді деп ешкім күтпеген еді! Бастапқыда бәрі оған жақындауға қорықты, бірақ оның өзгеше жануар екені белгілі болды. Жергілікті балықшылар мен инспекторлар Стёпа деп атап кеткен бұл жас қабан, торай кезінде өз үйірінен қалып қойған екен, оны балықпен тамақтандырған балықшылар болмағанда, аштықтан өліп қалуы мүмкін еді. Стёпа адамдардан қорықпайды және қазір өзін тамақтандыруы үшін күн сайын дерлік адамдарға келеді.

 Ең үлкен сәттілік — ең солтүстік антилопа болып табылатын әйгілі ақбөкенді (Saiga tatarica) кездестіру болды!

Түстен кейін студенттер түрлі омыртқасыз жануарларды, атап айтқанда жәндіктерді жинап, олардың түрлік тиесілілігін үлкен қызығушылықпен анықтады.

Оқу-далалық практика — бұл тек экскурсиялар мен сабақтар ғана емес, сонымен қатар студенттер үшін бірге тамақ әзірлеу және түрлі ойындар барысында араласып, көңіл көтерудің тамаша мүмкіндігі!

Қарбалас күннен кейін студенттерді көлдегі ғажайып күннің батуы күтіп тұрды!

Практикадан өту мүмкіндігін бергені үшін қорық басшылығы мен қызметкерлеріне алғысымызды білдіреміз. Жазғы оқу-далалық практика нәтижесінде студенттер зоология бойынша алған білімдерін бекітті, Қорғалжын қорығының бірегей табиғаты мен фаунасымен танысты, омыртқасыз жануарлардың коллекциясын жинады, сондай-ақ баға жетпес тәжірибе мен көптеген жарқын әсер алды.

 

Фото авторы: Д.А. Тағаев