ЕҰУ қызметкерлері ASIIN халықаралық біліктілікті арттыру бағдарламасынан өтуде

Л.Н. Гумилев атындағы Еуразия ұлттық университетінің профессор-оқытушылар құрамы мен әкімшілік-басқару персоналының 19 қызметкері «Сапаны қамтамасыз етудің халықаралық жүйелері» халықаралық біліктілікті арттыру бағдарламасы бойынша оқудан өтуде.

Бағдарламаны ұйымдастырушы - ASIIN Consult GmbH компаниясы. Бағдарлама білім берудің сапасын қамтамасыз етудің халықаралық жүйелері саласындағы білімді тереңдетуге және практикалық құзыреттерді дамытуға, білім беру бағдарламаларының сапасын бағалаудың заманауи тәсілдерін зерделеуге, сондай-ақ аккредиттеудің халықаралық тәжірибесімен танысуға бағытталған.

Оқыту 2026 жылғы 7-9 қыркүйек аралығында онлайн форматта басталды. Бағдарламаның офлайн кезеңі 2026 жылғы 14-19 қыркүйек аралығында Дюссельдорф қаласында (Германия) өтеді.

11 қыркүйекте академиялық мәселелер жөніндегі проректор Ардақ Бейсенбайдың бағдарламаға қатысушылармен кездесуі өтті. Кездесу барысында оқудан өтудің мақсаттары мен міндеттері талқыланды.

А.Бейсенбай университет қызметкерлерінің аталған бағдарламаға қатысуының маңыздылығын атап өтіп, алынған білім мен практикалық дағдылар ЕҰУ-дың ішкі сапаны қамтамасыз ету жүйесін одан әрі дамытуға, білім беру бағдарламаларын жетілдіруге, сондай-ақ жоғары білім сапасын қамтамасыз ету саласындағы халықаралық тәсілдер мен үздік практикаларды енгізуге ықпал ететінін атап өтті.

Кездесу барысында оқытуды ұйымдастыруға қатысты мәселелер, бағдарламаның мазмұны мен негізгі бағыттары, сондай-ақ жоғары білім сапасын қамтамасыз ету саласындағы қызметкерлердің халықаралық деңгейдегі кәсіби дамуына қатысты мәселелер қарастырылды.

ЕҰУ қызметкерлерінің халықаралық біліктілікті арттыру бағдарламасына қатысуы университеттің сапа мәдениетін дамыту, сапаны қамтамасыз етудің ішкі тетіктерін жетілдіру және қызметкерлердің кәсіби құзыреттерін заманауи халықаралық талаптарға сәйкес нығайту бағытындағы жүйелі жұмысының маңызды элементі болып табылады.