100 ден астам қатысушы ENU Marathon күзгі марафонының басталуына шықты

Л.Н. Гумилев атындағы Еуразия ұлттық университеті студенттерді, оқытушылар мен қызметкерлерді спорт пен белсенді өмір салтына тағы бір мәрте біріктірді. Университетте дәстүрлі күзгі ENU Marathon - ЕҰУ-дың жарқын спорттық дәстүрлерінің біріне айналған ауқымды жеңіл атлетикалық жүгіру жарысы өтті.

Марафонның басты мақсаты - қашықтықты еңсеру ғана емес, сонымен қатар бірлік, өзара қолдау және командалық рух қалыптасқан орта құру. ЕҰУ үшін бұқаралық спортты дамыту университет мәдениетінің маңызды бөлігі болып табылады. Бұл бағыт салауатты әдеттерді қалыптастыруға және тұлғаның үйлесімді дамуына ықпал етеді.

Спорттық іс-шараны Жаратылыстану ғылымдары институты, Жастар департаменті және ЕҰУ-дың дене шынықтыру және спорт кафедрасы ұйымдастырды. Ұйымдастырушылардың бірлескен жұмысының арқасында қатысушылар үшін қашықтықты қауіпсіз әрі жайлы еңсеруге қажетті жағдайлар жасалды.

Университет басшылығы мен ұйымдастырушылар атынан құттықтау сөз сөйлеген ЕҰУ омбудсмені Нэля Шапекова дене шынықтыру мен белсенді өмір салтының қазіргі студент пен университет қауымдастығы өміріндегі маңызын атап өтті.

Жарыс басталар алдында кәсіби жаттықтырушылар мен дене шынықтыру және спорт кафедрасының оқытушылары қатысушыларға арнайы сергіту жаттығуларын өткізді. Жаттығу спортшыларды алдағы қашықтыққа дайындап, белсенді жарысқа бейімделуге мүмкіндік берді.

ENU Marathon жарысының басты кезеңі 10 шақырымдық жүгіру болды. Сөреге тәжірибелі спортшылар мен әуесқой жүгірушілер, студенттер мен университет қызметкерлерін қоса алғанда, 100-ден астам қатысушы шықты.

Бүкіл қашықтық бойы қатысушылар төзімділік, қайсарлық және жоғары нәтижеге деген ұмтылысын көрсетті. Біреулер үшін бұл жүгіру кезекті спорттық сынақ болса, енді біреулер үшін өз күшін алғаш рет осындай қашықтықта сынап көруге мүмкіндік болды.

Қатысушылардың бір-біріне көрсеткен қолдауы марафонға ерекше атмосфера сыйлады. Жарыс жай ғана спорттық бәсеке емес, ЕҰУ-дың әр буын өкілдерін біріктірген ортақ университеттік мерекеге айналды.

Жүгіру аяқталғаннан кейін жеңімпаздарды марапаттау рәсімі өтті. Студенттер мен қызметкерлер арасында әртүрлі санаттар бойынша жеңімпаздар мен жүлдегерлер медальдармен және естелік сыйлықтармен марапатталды.

Қатысушылар үшін тағы бір жағымды сәт - ЕҰУ омбудсменінің арнайы дастарханы болды. Жарыстан кейін спортшыларды дәстүрлі бауырсақ пен таңқурай қосылған ыстық шай күтті.