ЕҰУ CDIO Asian Regional Meeting 2026 халықаралық кездесуіне қатысты

Л.Н. Гумилев атындағы Еуразия ұлттық университетінің өкілі Азия елдерінің жоғары оқу орындары мен білім беру ұйымдарының өкілдерін біріктірген CDIO Asian Regional Meeting 2026 (CDIO ARM 2026) халықаралық іс-шарасына қатысты.

Кездесу Өскемен қаласындағы Д. Серікбаев атындағы Шығыс Қазақстан техникалық университетінің базасында өтті. Биылғы іс-шара «Next-Gen Engineering: The New Triad of Academia, Industry and AI» тақырыбына арналды. Аталған тақырып инженерлік білім беруді трансформациялаудың негізгі бағыттарын, атап айтқанда, университеттер, индустрия және жасанды интеллект салалары арасындағы өзара байланысты дамыту мәселелерін қамтиды.

Л.Н. Гумилев атындағы Еуразия ұлттық университетін іс-шарада Академиялық мәселелер департаментінің әдістемелік сүйемелдеу және инновациялар бөлімінің басшысы Анар Қарибаева таныстырды.

ЕҰУ-дың CDIO ARM 2026 жұмысына қатысуы инженерлік кадрларды даярлаудың заманауи халықаралық тәжірибесімен танысуға, білім беру бағдарламаларын жобалаудың жаңа тәсілдерін талқылауға және Азия елдерінің жоғары оқу орындары мен білім беру ұйымдарының өкілдерімен тәжірибе алмасуға мүмкіндік берді.

Кездесу барысында CDIO қағидаттарын білім беру үдерісіне енгізу, жоғары оқу орындарының индустриямен өзара іс-қимылы, сондай-ақ жасанды интеллект құралдарын оқыту үдерісінде пайдалану мәселелері талқыланды. Сонымен қатар білім беру бағдарламаларын жетілдірудің және кәсіби ортаның өзгермелі талаптарына жауап бере алатын мамандарды даярлаудың практикалық аспектілеріне ерекше назар аударылды.

ЕҰУ үшін осындай халықаралық іс-шараларға қатысу академиялық ынтымақтастықты дамыту, кәсіби тәжірибе алмасу және білім беру үдерісін ұйымдастырудың заманауи тәсілдерін зерделеу тұрғысынан маңызды. Іс-шара барысында алынған тәжірибе университетте әдістемелік сүйемелдеу мен инновациялық тәсілдерді одан әрі жетілдіру бағытында пайдаланылуы мүмкін.

CDIO (Conceive - Design - Implement - Operate) - инженерлік білім беруді жетілдіруге және студенттердің нақты кәсіби міндеттерді шешуге қажетті құзыреттерін қалыптастыруға бағытталған халықаралық білім беру бастамасы. Тұжырымдама 1990-жылдардың соңында Массачусетс технологиялық институты мен бірқатар серіктес университеттердің қатысуымен әзірленді.

Бүгінде CDIO академиялық даярлықты кәсіби қызметтің практикалық талаптарымен ұштастыруға бағытталған тәсілдердің бірі ретінде қарастырылады. Оның аясында жобалық жұмысқа, индустриямен өзара іс-қимылға және кешенді инженерлік құзыреттерді дамытуға ерекше мән беріледі.