
Конституциялық сот ісін жүргізудің шетелдік тәжірибесі: ЕҰУ докторантының ашық сабағы

2026 жылғы 30 қазанда 8D04201 «Құқықтану» білім беру бағдарламасының 2-курс докторанты Мұрат Оспанов «Салыстырмалы конституциялық іс жүргізу құқығы» пәні бойынша «Конституциялық сот ісін жүргізуде судьяның сот отырысына басшылық етуі, өтінішхаттарды қарау және қарсылық білдіру тәртібі» тақырыбында ашық сабақ өткізді.
Сабақ Конституционализм және цифрлық құқық институтының директоры, профессор Е.Б. Абдрасуловтың жетекшілігімен педагогикалық практика аясында өтті.
Сабақ барысында әділ сот ісін жүргізу қағидаттары, процестік кепілдіктер, судьялардың өкілеттіктері, өтінішхаттарды қарау және қарсылық білдіру тәртібі талқыланды. Қазақстан, Германия, Франция, АҚШ және ТМД елдерінің конституциялық сот төрелігіне салыстырмалы талдау жасауға ерекше назар аударылды.
Практикалық бөлім іскерлік ойын форматында өтіп, студенттер Конституциялық Сот отырысын модельдеді. Қатысушылар әртүрлі процестік рөлдерді орындап, өтінішхаттар мен қарсылықтар білдірді, өз ұстанымдарын дәлелдеп, процестік шешімдер қабылдады.
Сабақ салыстырмалы-құқықтық талдау, құқықтық дәлелдеу және конституциялық іс жүргізу құқығы нормаларын практикада қолдану дағдыларын дамытуға ықпал етті.
