
Педагогикалық шеберлік мектебі: Ланкастер университетіндегі тағылымдама тәжірибесі және оны химияны оқытуда қолдану

16 қарашада химия кафедрасында Педагогикалық шеберлік мектебі аясында кафедраның доцент м.а., PhD А.Г. Жаксыбаева «Ланкастер университетіндегі тағылымдаманың педагогикалық тәжірибесі және оны химияны оқытуда қолдану мүмкіндіктері» тақырыбында баяндама жасады.
Баяндамашы Ланкастер университетінде (Lancaster University, Ұлыбритания) өткен тағылымдамадан алған жеке тәжірибесімен бөлісіп, оқу және ғылыми-зерттеу процестерін ұйымдастырудың ерекшеліктері туралы айтып берді. Заманауи зертханалық жабдықтарға, сондай-ақ ЯМР-спектроскопия, масс-спектрометрия жүйелерімен, органикалық синтез бен электрондық микроскопияға арналған жабдықтармен жарақталған зерттеу орталықтарына ерекше назар аударылды. Баяндаманың жеке бөлімі химиялық пәндердің пәнаралық байланыстарына арналды. Университетте жүргізілетін ғылыми зерттеулер медицина, энергетика, материалтану және экология сияқты салалардағы өзекті практикалық міндеттерді шешуге бағытталғаны атап өтілді.
Білім алушылардың кәсіби және зерттеушілік құзыреттерін қалыптастыруға бағытталған практикаға бағдарланған оқытуды жүзеге асыру тәжірибесі ерекше қызығушылық тудырды. Баяндамашы студенттер кіші курстардан бастап ғылыми ойлау мен зерттеу дағдыларын дамытуға ықпал ететін шағын зерттеу жобаларына тартылатынын, ал жоғары курстарда ғылыми-зерттеу жұмыстарын өз бетінше орындауға мүмкіндік алатынын атап өтті.
Ұсынылған тәжірибе тыңдаушылардың қызығушылығын тудырып, жекелеген шетелдік білім беру тәжірибелерін кафедраның оқу процесіне бейімдеу мүмкіндіктерін талқылауға мүмкіндік берді.
