Қадірлі Ерлан Бәтташұлы!
Ең алдымен, университетіміздің дамуына қосып жүрген еңбегіңіз бен атқарып жатқан қызметіңізге алғысымды білдіремін. Бүгінде оқу ордамыздың заманауи бағытта дамып, ғылыми базалық инфроқұрылымға ерекше көңіл бөлуі сіздің тікелей басқарушылық көзқарасыңыздың және командаңыздың ұстанымының айқын нәтижесі деп ойлаймын. Әсіресе студенттерге мүмкіндік беру, бастамаларды қолдау және жастардың жаңа идеяларына ашық болу қасиетіңіз біз секілді студенттер үшін үлкен жігер береді. Университет қабырғасында білім алып жүрген көптеген жастар оқу ордамыздың соңғы жылдары жаңа деңгейге көтеріліп келе жатқанын анық сезінеді.
Қазіргі таңда Мемлекет басшысы Қасым-Жомарт Кемелұлы Тоқаев өз жолдауларында жасанды интеллект, цифрландыру және ақпараттық технологиялар саласын дамыту мәселесіне ерекше назар аударып келеді. Әлемдегі дамыған мемлекеттердің барлығы бүгінде білім, ғылым және технология арқылы алға жылжып отырғаны белгілі. Сондықтан университеттер тек теориялық білім берумен шектелмей, студенттерді болашақ технологиялық ортаға дайындайтын маңызды орталыққа айналуы қажет деп есептеймін. Әсіресе жасанды интеллект, деректер ғылымы, киберқауіпсіздік және бағдарламалау салалары болашақтың негізгі бағыттарына айналып келеді. Осы тұрғыда біздің университеттің де үлкен әлеуеті бар екеніне сенемін.
Осы кезекте, студент ретінде, тәмамдаушы түлек ретінде университетіміздің болашағына қатысты бірнеше ұсынысымды білдіргім келеді.
Біріншіден, шетелдік университеттердің тәжірибесіне сүйене отырып, Ректор алғыс хатымен қатар Декан алғыс хаттарын жүйелі түрде енгізуді ұсынамын. Әсіресе жоғары академиялық нәтиже көрсеткен, ғылыми жобаларға қатысқан, университеттің қоғамдық өміріне белсенді араласқан студенттерді әр семестр сайын марапаттау жастардың білімге деген ынтасын арттырады деп ойлаймын. Мұндай қолдау студенттерге тек мотивация беріп қана қоймай, олардың еңбегінің бағаланатынын сезіндіреді.
Екіншіден, жас мамандар мен студенттерді технологиялық ортаға көбірек тарту маңызды деп есептеймін. Сөздің шыны, қазіргі таңда АКТ мамандықтарындағы ПОҚ қартайды. Университетімізде IDSAI институтының ашылуы өте маңызды әрі болашағы зор қадам болды. Ендігі кезекте IT-компаниялармен байланысты күшейтіп, тәжірибе алмасу жұмыстарын дамыту қажет деп ойлаймын. Мысалы, IT университеттер альянсын құрып, IT оқу орындарымен немесе технологиялық компаниялармен бірлескен жобалар, хакатондар және практикалық воркшоптар ұйымдастырылса, студенттердің тәжірибелік білімі әлдеқайда артар еді.
Үшіншіден, Guest Lecture форматындағы кездесулерді тұрақты түрде енгізуді ұсынамын. Шетелдік университеттерде тәжірибелі мамандар мен индустрия өкілдері студенттермен кездесіп, өз тәжірибелерімен бөліседі. Осындай формат біздің университетте де практикалық пәндер аясында енгізілсе, студенттер тек теориялық білім алып қана қоймай, нарықтағы нақты талаптарды да тереңірек түсінер еді. Әсіресе 15 апталық оқу барысында әр пәнге байланысты кәсіби мамандармен бір рет бір потокпен ашық сұхбат өткізу өте пайдалы болар еді деп ойлаймын.
Төртіншіден, Senior–Junior mentorship жүйесін енгізуді ұсынамын. Яғни, жоғары курс студенттерінен белсенді әрі жауапкершілігі жоғары менторлар іріктеліп, олар бірінші курс студенттеріне университеттегі практика, оқу процесі, академиялық жүйе және студенттік өмір бойынша бағыт-бағдар беретін формат қалыптастыруға болады. Әсіресе жазғы практика кезеңінде немесе оқу жылының алғашқы айларында мұндай қолдау жас студенттердің университет ортасына тез бейімделуіне көмектесер еді. Сонымен қатар бұл бастама жоғары курс студенттерінің белсенділігі мен волонтерлік мәдениетін арттырады деп ойлаймын. Осындай қоғамдық және академиялық белсенділік танытқан студенттерді жоғарда атаған Ректор немесе Декан алғыс хатымен марапаттауға болады.
Бесіншіден, қазіргі еңбек нарығының талаптарына сәйкес студенттер бірінші курстан бастап өзінің кәсіби резюмесін қалыптастыруы қажет деп есептеймін. Бүгінде жұмыс берушілер тек дипломға емес, нақты тәжірибе, жобалар, портфолио және белсенділікке назар аударады. Осыған байланысты студенттерге алғашқы оқу жылынан бастап резюме, профиль, және кәсіби портфолио жинаудың маңызын түсіндіру қажет деп ойлаймын. Бұл бағытта төртінші пунктегі Senior–Junior mentorship жүйесі де тиімді болар еді, себебі жоғары курс студенттері өз тәжірибесімен бөлісіп, кіші курс студенттеріне бағыт бере алады. Сонымен қатар әр кафедраға арнайы Career Advisor маманы тағайындалса, студенттердің кәсіби дамуына қолдау көрсетіп, резюмесіне қарай отыра еңбек нарығына шығарар еді.
«Көш жүре келе түзеледі» демекші, бұны мін не сын ретінде емес прагматикалық ұсыныстар деп қабылдарсыз. Мен, Университет қабырғасында алған білімім мен көрсетілген қолдау үшін университет ұжымына шынайы алғысымды білдіремін. Университетіміздің бірегей қолдауы «ENU Ambassadors» бағдарламасы арқылы Малайзияның озық тәжіриесін бір семестр көзбен көрдім. Бұл ретте, университетімізде ғылым мен технология саласына қызығушылық танытқан жастарға жасалып жатқан мүмкіндіктер аз емес. Сонымен қатар, «ЕҰУ Ендаумент Қоры» атынан жас зерттеуші ретінде степендия иегері, ҚР Президенті степендиаты иегері атануым мен үшін үлкен мәртебе болды. Қазіргі таңда ғылыми бағытта белсенді жұмыс жасап келемін, ғылыми жарияланымдарым бар, ал h-index көрсеткішім 2-ге жетті. Алдағы уақытта да университетіміздің дамуына өз үлесімді магистратураға түссем жалғастыру ниетіндемін.
Сөз соңында, айып болмаса, сізге кішкентай өтінішімді білдіргім келеді. Университеттің сары түсті «ЕНУ» төсбелгісін алу мен үшін үлкен мәртебе болар еді. Өкінішке қарай, ол еркін сатылымда жоқ екен. Егер мүмкіндік болып жатса, осы өтінішімді орындай алсаңыз, мен үшін ерекше қуаныш болар еді.
Уақытыңызды бөліп, хатымды оқып шыққаныңыз үшін рақмет! Университетіміздің мерейі артып, кәсіби жолыңыздағы бастамаларыңыз әрдайым сәтті болсын. Ел игілігі жолындағы қызметкерлерге толағай табыс тілеймін. Аман болайық! Университетіміздің 30 жылдығы тұғырлы болсын.
Құрметпен,
