ҚАЗАҚ БАЙЛАРЫ ФЕНОМЕНІ ЖЫЛ САЙЫНҒЫ ХАЛЫҚАРАЛЫҚ CESS КОНФЕРЕНЦИЯСЫНДА ТАЛҚЫЛАНДЫ
2024 жылдың 06-09 маусымында Алматы қаласында "Тұран" университетінің өңірлік зерттеулер орталығы базасында Орталық-Еуразиялық зерттеулер қоғамының – CESS – жыл сайынғы халықаралық конференциясы өтті. Орталық Еуразияның өткені мен бүгіні мәселелерімен айналысатын бүкіл әлем ғалымдары мен мамандарының пікір алмасу алаңы құрылды.
2024 жылдың 7 маусымында ҚР Ғ және ЖБМ AP19679187 "Kazakh bai in the conditions of imperial and Bolshevik modernization" (Л. Н. Гумилев атындағы ЕҰУ) атты грантты орындаушыларының – Қазақстан тарихы кафедрасының ғалымдары – т.ғ.д., профессор С. И. Ковальскаяның (ғылыми жетекші), т. ғ. к., доцент Г. К. Ерменбаеваның (жетекші ғылыми қызметкер) ұйымдастыруымен дөңгелек үстел өтті. Дөңгелек үстел аясында қазақ байлары феномені, ХІХ ғасырдың екінші жартысы - ХХ ғасырдың бірінші жартысындағы маңызды оқиғалардағы байлардың әлеуметтік – экономикалық және саяси рөлін, империялық және большевиктік жаңғыру сын-тегеуріндеріне "жауаптарын" зерделеуге байланысты ерекшеліктері мен күрделіліктері талқыланды. Дөңгелек үстел жұмысына Қазақстан және Ресейдің белгілі тарихшылары, профессорлар С.А. Жакишева мен Д.А. Аманжолова қатысты.
Конференция аясында Орталық Еуразия елдері мен халықтарының тарихы, мәдениеті және қазіргі дамуы мәселелері бойынша 130-дан астам отырыс өтті, әлемнің түрлі елдерінен келген ғалымдардың 450-ден астам баяндамасы тыңдалды. Конференцияға Орталық Азия тарихы мен мәдениеті бойынша танымал мамандар Сара Кэмерон, Гүлнар Кендірбай, Сәулеш Есенова, Джефф Сахадео, Абель Полесе және тағы басқалары қатысты.