Заң факультетінің бітіруші курс түлектеріне арналған диплом тапсыру салтанатты іс-шарасы өтті
2024 жылдың 19 маусымында Л.Н. Гумилев атындағы Еуразия ұлттық университеті Заң факультетінің бітіруші курс түлектеріне арналған диплом тапсыру салтанатты іс-шарасы өтті. Салтанатты шараны университет Басқарма төрағасы - ректоры, тарих ғылымдарының докторы, профессор Сыдықов Ерлан Бәтташұлы ашып, құттықтау сөз сөйледі. Университет басшысы білім ордасының қоғамдық өміріне белсене араласқан түлектерді алғыс хатпен марапаттап, университетті бітіруші оқу үздіктеріне диплом табыстады.
Заң факультетінің деканы, з.ғ.д., профессор Сматлаев Бауыржан Мамытбекұлы құттықтау сөзінде келген меймандарға ризашылығын білдіріп, түлектерімізге тілек айтып, үздік диплом иегерлеріне дипломдарын табыстады.
Салтанатты рәсімде, сондай-ақ, факультеттің кафедра меңгерушілері және арнайы шақыртылған құрметті профессорлар қауымы бітіруші түлектерге сәттілік тілеп, дипломдарын табыстады.
Биылғы оқу жылының қорытындысы бойынша Заң факультеті бойынша бакалавриат деңгейінде – 68, оның ішінде үздік диплом иегерлері – 30, магистратура бойынша 28 білім алушы дипломдарын алды.
Салтанатты жиын барысында «Алтын домбыра» өнер мектебінің ұжымы ансамбльдік орындауда Құрманғазының «Балбырауын» күйін, Әбдімомын Желдібаевтың «Еркесылқым» күйін көрерменге тарту етті, «Құқықтану» мамандығының 2-курс студенті, Түркістан облысының ұлттық және заманауи би бойынша лауреаты Абдукадирова София би өнерін, сонымен қатар «Тек алға» әнімен бітіруші түлегіміз Төлеужанова Әсем өнер көрсетті. Салтанатты іс-шара видеобейне, естелік фотоға түсумен өз мәресіне жетті.
Заң факультетінің ұжымы бітіруші түлектерді осындай айтулы оқиғамен құттықтайды! Бітіруші түлектерге тек сәттілік тілейміз және еліміздің білімді, адал, әрі әділ азаматтарының қатарын толықтыруына тілектеспіз! Елімізді көркейтуге өз үлестеріңізді қоса беріңіздер!