Сарапшылар ЕҰУ-де инклюзивті білім беруді дамыту мәселесін талқылады
Еуразия ұлттық университетінде «Ашық әңгіме: инклюзивті білім беруді дамыту және жаңа форматтағы кадрларды даярлау бойынша ұсыныстар» атты дөңгелек үстел өтті.
Іс-шараның мақсаты – «Паруса духа» халықаралық қозғалысын және оның инклюзивті бағытын дамытуға әсерін зерттеу, сондай-ақ инклюзивті білім беру мен жаңа форматтағы оқытуды ілгерілету үшін озық тәжірибелер мен инновациялық тәсілдерді біріктіру жолдарын талқылау. Сондай-ақ шара онлайн режимінде өтті.
Шараға ЕҰУ-дің әлеуметтік-мәдени даму жөніндегі проректоры Ләззат Төлегенқызы, Қазақстан Республикасы Парламенті Сенатының депутаты Әсем Рахметова, ЕҰУ Жоғары білім мектебінің директоры Баубек Сомжүрек, «Паруса духа» халықаралық қозғалыс жетекшілері Олег Калпащиков пен Виктор Клоков, Алматыдағы ЮНЕСКО Өңірлік өкілдігінің әлеуметтік және гуманитарлық ғылымдар секторының меңгерушісі Мақсат Байбеков, сонымен қатар университет оқытушылары мен студенттері қатысты.
«Біздің іс-шара тек біздің университет үшін ғана маңызды емес. Елімізде мүмкіндігі шектеулі жандарды қолдау, инклюзивті білім беруді дамыту бағытында үлкен жұмыстар жүріп жатыр. Біздің университетте әртүрлі санаттағы мүгедектігі бар 170-тен астам адам білім алуда. ЕҰУ-де Инклюзивті қолдау орталығы екінші жыл жұмыс істейді. Біз әлеуметтік қызметкерлерді, психологтарды, дефектологтарды, реабилитологтарды шақырдық», - деді проректор Ләззат Төлегенқызы.
Қазақстан Республикасы Парламенті Сенатының депутаты Әсем Рахметова ерекше қажеттіліктері бар Қазақстан Республикасының азаматтары жеңілдіктерді пайдаланып қана қоймай, қоғам өміріне белсенді араласу мүмкіндігіне ие болуы керектігін баса айтты.
«Ерекше білім беру қажеттіліктері бар балаларды қорғау бойынша тұрақты негізде жұмыс жүргізілуде, бұл саладағы стандарттар аймақтардың ерекшеліктерін ескере отырып жаңартылуда.
2023 жылдың 23 қазанында Сенатта Инклюзия кеңесі құрылды. Өткен жылы Мемлекет басшысының жарлығымен халықтың әлеуметтік осал санаттарының құқықтарын қорғау жөніндегі дербес омбудсмен институты құрылды. Инклюзивті саясат тұжырымдамасы әзірленуде», - деді спикер.
«Паруса духа» халықаралық қозғалысы туралы толық ақпаратты ұйым жетекшісі Олег Калпащиков айтты:
«Паруса духа» жобасының негізгі мақсатты аудиториясы – мүмкіндігі шектеулі жандар емес, мүмкіндігі шектеулі жандармен араласатындар және соның арқасында жасырын дарындар мен қабілеттерді ашатындар. Біз үшін инклюзия - өзара әрекеттесу. Біз үшін мұндай инклюзивті іс-шараларды дамыту маңызды, онда біз мүмкіндігі шектеулі адамдар жай ғана клиент емес, олар мүмкіндігі шектеулі адамдарға оң әсер ететін сценарий жасаймыз», - деп атап өтті Олег Калпащиков.
Дөңгелек үстел барысында жаңа форматта кадрларды даярлау мәселелері және инклюзивті білім берудің болашақ перспективалары талқыланды.